| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 36.55 | Dem. 36.60 (English) | >>Dem. 36.62 |
36.58ἃ μὴ προῆσθε , μηδʼ ἐπιτρέψητʼ ἀνατρέψαι τῷ μιαρῷ τούτῳ ἀνθρώπῳ , μηδὲ ποιήσητʼ αἰσχρὸν παράδειγμα , ὡς τὰ τῶν ἐργαζομένων καὶ μετρίως ἐθελόντων ζῆν τοῖς βδελυροῖς καὶ συκοφάνταις ὑπάρχει παρʼ ὑμῶν λαβεῖν · πολὺ γὰρ χρησιμώτερʼ ὑμῖν παρὰ τῷδʼ ὄνθʼ ὑπάρχει . ὁρᾶτε γὰρ αὐτοὶ καὶ ἀκούετε τῶν μαρτύρων , οἷον ἑαυτὸν τοῖς δεηθεῖσι παρέχει .
36.59καὶ τούτων οὐδὲν εἵνεκα τοῦ λυσιτελοῦντος εἰς χρήματα πεποίηκεν , ἀλλὰ φιλανθρωπίᾳ καὶ τρόπου ἐπιεικείᾳ . οὔκουν ἄξιον , ὦ ἄνδρες Ἀθηναῖοι , τὸν τοιοῦτον ἄνδρα προέσθαι τούτῳ , οὐδὲ τηνικαῦτʼ ἐλεεῖν ὅτʼ οὐδὲν ἔσται τούτῳ πλέον , ἀλλὰ νῦν ὅτε κύριοι καθέστατε σῷσαι · οὐ γὰρ ἔγωγʼ ὁρῶ καιρὸν ἐν τίνι ἂν μᾶλλον βοηθήσειέ τις αὐτῷ .
36.60τὰ μὲν οὖν πόλλʼ ὧν Ἀπολλόδωρος ἐρεῖ , νομίζετʼ εἶναι λόγον καὶ συκοφαντίας , κελεύετε δʼ αὐτὸν ἐπιδεῖξαι , ἢ ὡς οὐ διέθετο ταῦθʼ ὁ πατήρ , ἢ ὡς ἔστιν τις ἄλλη μίσθωσις πλὴν ἧς ἡμεῖς δείκνυμεν , ἢ ὡς οὐκ ἀφῆκεν αὐτὸν διαλογισάμενος τῶν ἐγκλημάτων ἁπάντων , ἃ ἔγνω <θʼ > ὁ κηδεστὴς ὁ τούτου καὶ οὗτος αὐτὸς συνεχώρησεν , ἢ ὡς διδόασιν οἱ νόμοι δικάζεσθαι τῶν οὕτω πραχθέντων , ἢ τῶν τοιούτων τι δεικνύναι .
36.61ἐὰν δʼ ἀπορῶν αἰτίας καὶ βλασφημίας λέγῃ καὶ κακολογῇ , μὴ προσέχετε τὸν νοῦν , μηδʼ ὑμᾶς ἡ τούτου κραυγὴ καὶ ἀναίδειʼ ἐξαπατήσῃ , ἀλλὰ φυλάττετε καὶ μέμνησθʼ ὅσʼ ἡμῶν ἀκηκόατε . κἂν ταῦτα ποιῆτε , αὐτοί τʼ εὐορκήσετε καὶ τοῦτον δικαίως σώσετε , ἄξιον ὄντα νὴ τὸν Δία καὶ θεοὺς ἅπαντας .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 36.55 | Dem. 36.60 (English) | >>Dem. 36.62 |
